VOA Amharic ቤቶቻቸው እየፈረሱ መሆኑን ማይ ካድራ የሚኖሩ ተናገሩ

በምዕራባዊ ትግራይ ዞን ማይ ካድራ ከተማ ላለፈት ሃያ ዓመታት ነዋሪ የሆኑ ሰዎች ቤቶቻቸው በአካባቢው ባለሥልጣናት እየፈረሱባቸው መሆናቸውንና ያለመጠለያ መቅረታቸውን እየገለፁ ነው።

አቤቱታቸውን የሚሰማቸው ማጣታቸውንና ከመካከላቸው የታሠረ ሰውም እንዳለ አመልክተዋል።

በድርቅ ምክንያት ያለሰብል መቅረታቸውንና እርዳታም እንደማያገኙ ተናግረዋል።

በአካባቢያቸው ሙስና መንሠራፋቱን ነዋሪዎቹ የሚናገሩ ሲሆን ሕገወጥ አስተላላፊዎች ብዙ ወጣቶችን እያስወጡ መሆናቸውንና አንዳንድ በፖሊስና በመንግሥቱ መዋቅር ውስጥም ለአስተላላፊዎቹ ድጋፍና ከለላ የሚሰጡ መኖራቸውን ጠቁመዋል።

ቅሬታዎቻቸውን ሲያቀርቡ የተለያዩ የፖለቲካ ፍረጃዎች እንደሚካሂዱባቸው አመልክተዋል።

በሌላ በኩል ደግሞ የወልቃይት ሕዝብ የአማራ ማንነት ጥያቄ ኮሚቴ አባላት ለአቤቱታ አዲስ አበባ ገብተው ከትናንት፤ ረቡዕ ጀምሮ እዚያው ቢገኙም የፌደሬሽን ምክር ቤቱን አፈ ጉባዔ ለማግኘት እንዳልተሣካላቸው ገልፀዋል።

ከባለሥልጣናቱ ምላሽ ለማግኘት እየጣርን እንገኛለን፤ ለዛሬ ያደረግናቸው ጥረቶች አልተሣኩም።